Buhan nang lawas banar jadi hansip gagarunum lawan pambakal, jar buhannya kada suah dibawai ka acara nang harat. Mandangar ngitu kada nyaman kalu pambakal, jadi buhannya dibawai ka acara camat.

“Apa ngarannya gadung ngini Nang ?,” ujar Utuh Kalubut. “Ujar jualah, ngarannya aula pang,” ujar Nanang Klelepon. “Acara apa yu, nang kita umpati nginih ?,” ujar Utuh Kalubut. “Ujar jua lah, acaranya palantikan camat,” ujar Nanang Klelepon.

“Siapa nang malantik yu ?,” ujar Utuh Kalubut, “Abah ikam…, mauk batakun tarus kaya napa ha lagi” ujar Nanang pina sarik. “Hi-ih bada-diam haja pang,” ujar Amang Iram.

Hinip Utuh Kalubut Kada sing bunyian lagi, kada lawas datangan buhan pajabatnya. Pina mangkining ha sapatu buhannya.

“Kada supankah kita nih ?, urang datangan basapatu harat-harat, kita basandal gapit,” ujar Utuh Kalubut. “Biar haja, napa garang! kadada jua nang manyuruh,” ujar Amang Iram manyahuti. “Kada-ah, asa kada nyaman banarai,” ujar Utuh Kalubut. “Mun kada nyaman, bulik ikam saurangan,” ujar Nanang Klelepon.

“Kada ku hakun bulik saurangan, kanyamanan buhan ikam kaina makanan nyaman,” ujar Utuh Kalubut pina takulibi. “Han mun kaya itu baranai sudah, jangan tapi banyak batakun,” ujar Amang Iram.

Imbah acaranya handak dimulai, kanapakah ada orang nang mandatang buhannya. Imbah ngitu langsung haja managur buhannya.

“Buhan ikam ka sini,” ujar Jabrik manunjuk buhannya. “Napa jadi mangiyau kita, ayu lakasi kita datangi,” ujar Nanang Klelepon mahancap datang.

“Nah…. duit pacah, lajui bajauhan pada sini,” ujar Jabrik manjulung duit. “Duit napa, kami kada handak minta duit,” ujar Amang Iram. “Kada tahu tarima kasih, lajui bajauhan pada sini,” ujar Jabrik sambil manciling-ciling.

Napa ada buhannya lakas bajauhan, handak malawani katiya urangnya sing ganalan. Pada taungutan buhannya di luar aula, mahadangi pambakal. ”Han… napa jar ku, gara-gara sandal gapit haja, sangkah urang kita minta sadakah,” ujar Utuh Kalubut manumpalak buhannya.(mr-85)