Imbah lawas bapintaan sumbangan di jalan, takumpul pina banyak sudah duitnya. Imbah takumpul duitnya, mauk pulang buhannya mamikirakan kayapa ma-antar ka wadah urang nang takana musibah. Napa sing jauhan. Handak tulakan ka Jogja jadi relawan, katiya kada wani, lawan kada tahu jua manuju.

“Kayapa lah ma antar duit nginih,” ujar Amang Iram sambil ma-angkat duit sakarungan.

“Hi-ih lah, maka Jogja ngitu jauh banar,” ujar Nanang Klelepon pina mandam mamikirakan.

“Kayapa kita tulakan haja ka sana,” ujar Utuh Kalubut. “Jakanya tahu manuju tulakan-ai, mun kada tahu busiah sasat,” ujar Amang Ibud. “Bujur jua pang, mun sasat harau kada kawa bulikan,” ujar Nanang Klelepon.

Lawas buhannya mandaman mamikirakan. Nanang pina bulang-bulik bajalan sambil mamikirakan, kanapakah batisnya tasipak koran Radar . Diambilnya-ai koran, pas dibuka pas RBP manarima dana hagan korban gempa.

“Tatamu hudah jalanya……!,” ujar Nanang Klelepon sambil bahindik-hindik. “Tatamu jalan apa Nang,” ujar Amang Iram. “Jalan maantar duitnya, supaya sampai ka Jogja,” ujar Nanang.

“Kaya pa caranya,” ujar Amang Iram. “Nah baca saurangan, nyaman tahu,” ujar Nanang Klelepon.

Imbah mambaca-i koran ngitu, langsung haja buhannya bassiap tulakan mandatangi kantor Radar. Sampai ka tarminal langsung haja buhannya naik motor hulu, imbah malihat Radar nang di Ulin buhannya minta singgahakan lawan supir.

Sampai di muharea lawang, urang kantur langsung kaluar, buhannya manjulung duit bakarung tadih. Malihat duit pacah sakarungan, nang jaga Radar pasawat bingung-ai. “Pian salah mang ai maantar, kanturnya di situ ngarannya Radar Banjarmasin, mun ngini radar babujuran” ujar panjaga radar sambil tatawa. Napa ada buhannya supan banar, nampak banar katahuan udiknya. Mahancap buhannya bajauhan pada kantur urang.” Handak baniat baik haja nasalah tarus,” ujar Amang Iram gagarunum.(mr-85)